BUTUAN CITY – Nagpadayon pa ang imbestigasyon sa Butuan City Police Station 5 aron masuta ang motibo ug maila ang responsable sa pagpamusil-patay sa duha ka mga tawo nga miresulta usab sa pagka-angol sa laing duha ka mga minor-de-edad.
Naila ang mga biktimang sila Emerson Minggoy Cervantes, 52-ayos ug Alberto Minggoy Cervantes, 50-anyos, pulos mga residente sa dapit nga nahitabuan sa P-21, Sitio Palutputan, Brgy. Maguinda, ning siyudad.
Nasayran nga ning mi-aging alas-8:15 sa buntag, gitaho sa barangay kapitan sa Maguinda ang maong pagpamusil nga girespondihan gilayon sa mga sakop sa Scene of the Crime Operatives kon SOCO.
Ang mga batang biktima, mga anak ni Alberto Cervantes kinsa prehong naka-angkon og tag-usa ka samad pinusilan ug gidala na sa Butuan Medical Center alang sa pagpatambal.
Narekober sa crime scene ang upat ka gitira na nga cartridge case sa 9mm pistol; tag-usa ka bala ug wala pa matirang cartridge sa susamang pistola; usa ka sundang nga duna’y mga lama sa dugo ug tulo ka mga bungay kansa parehong gidala sa police station alang sa tukmang disposasyon.
