BUTUAN CITY – Gi-andam na sa Butuan City Police Station 1 ang kasong robbery with homicide nga ipasaka batuk sa duha ka mga suspek sa pagpatay sa magtutudlong si Leonardo Basan Acejo Jr., 44-anyos, residente sa residente sa Las Casas Subdivision, Brgy. Baan Km. 4 ning siyudad, human sila nadakpan sa gilusad nga hot pursuit operation.
Unang nadakpan si pasado alas-dies kagabii sa iyang pinuy-anan sa Purok 6, Brgy. Holy Redeemer si Jerson Ebe Inot, 20-anyos, duna’y ka-ipon, service crew sa usa ka fast food chain.
Nakuha gikan sa iyang posisyon ang usa ka Yamaha Mio motorcycle nga duna’y plaka number no 568ZIP nga gibana-banang nagkantidad og Php70,000.00 kansa gipanag-iyahan sa biktima ingon man usa ka kutsiyo nga maoy gigamit sa pagdunggab sa biktima.
Pagka-ala una kaganinang kaadlawon, nadakpan usab sa P-4, Lower Doongan, Brgy. Doongan, ang laing suspek nga si Melvin Dealca Acampado, 21-anyos, duna’y live-in partner, construction worker ug residente sa P-7, Brgy. Villa Kananga ning siyudad.
Nakuha usab gikan sa iyang posisyon ang usa ka Samsung A71 Cellular phone color mint blue nga gibana-banang nagkantidad og Php20,000.00 nga gipanag-iyahan gihapon sa biktima.
