BUTUAN CITY – Mikaratil og dagan ang duha ka lalaking manglungkab na unta sulod sa usa ka balay sa Naga City, Camarines Sur human nakuratan dihang mitingog gikan sa CCTV ang tag-iya kinsa live diay nga mitan-aw kanila pasado alas-kwatro ganinang kaadlawon.
Dihang namatikdan nila ang CCTV sa balay, dali silang naghukas ug gitabon sa nawong ang t-shirt sa usa ka lalaki samtang naka-hoodie usab ang laing lalaki nga anaa na sa ikaduhang andana sa balay.
Gipalong pa nila ang suga ug usa kanila ang migamit og flashlight sabay tan-aw sa mga gamit sa sala.
Dinhi na mitingog ang tag-iya agi sa CCTV kinsa live diay nga mitan-aw sa ilang gihimo hinungdan sa pagkaratil nila og dagan.
Nasayrang usa ka combat engineer diay sa militar sa Amerika ang tag-iya sa balay ug na-access niya kini pinaagi sa internet.
Misibat nga wala’y nadalang gamit ang mga lalaki.
