BUTUAN CITY – Padayon ang law enforcement function sa kapulisan sa tibuok Caraga Region bisan og napa-ilalom na kaniadto sa enhanced community quarantine ngadto na sa general community quarantine tungod sa COVID-19 pandemic.
Gipamatud-an kini ni PMajor Renel Serrano, information officer sa Police Regional Office kon PRO-13 pinaagi sa ila matud pang nasikop nga 194 ka mga indibidwal nga duna’y arrest warrant atol sa gipakusgan nilang manhunt operations.
Sa eksklusibong pakighinabi sa Bombo Radyo Butuan, gibutyag ni Major Serrano nga kini gumikan sa ilang operasyong gisugdan niadtong Marso 17 ning tuiga hangtud ning mi-aging adlaw’ng Miyerkules, Mayo 27 – ang panahon diin ang rehiyon ilawom sa community quarantine, enhanced ug general.
Ang mga naaresto nag-atubang og managlahing kaso sama sa murder, homicide, physical injury, pap[anglugos, pagpanulis, pagpangawat og uban pa. GIkan sa 194, 18 kanila ang anaa sa kategoriyang most wanted kon kadtong anaa sa top 10 sa regional, provincial, ug municipal levels.
Ang Butuan City Police Office maoy mitala og pinakadaghang nadakpan nga mi-abot sa 52 ka mga indibidwal nga gisundan sa Agusan del Sur Police Provincial Office nga mi-abot sa 49; samtang 24 usab sa Surigao del Sur PPO; 22 sa Agusan del Norte; 21 sa Surigao del Norte PPO samtang ang Criminal Investigation and Detection Group nakadakop og 13; upat sa Regional Intelligence Unit-13; tulo sa Dinagat Islands PPO ug usa sa Regional Mobile Force Battalion.
