BUTUAN CITY – Gipailalom na sa Alert Level Alpha ang 15 ka probinsiya sa Luzon tungod sa paghapak sa bagyong Kiyapo.
Ang Alpha level nagpasabot nga ang mga nasakop nga probinsiya anaa ilalom sa 700-km diameter sa bagyo o sakop sa 400 kms sa sidlakan ug 300 kms sa kasadpan sa forecast track.
Ang mga nasangpit nga probinsiya makasinati og pagbuylo sa hangin nga muabot hangtud sa 45 kilometers per hour.
Ang nasangpit nga paghuros sa hangin mamahimong magresulta sa pagkaguba sa kabtangan, mga panimalay ug gagmay nga pasilidad.
Gilangkuban kini sa mga musunod: Abra; Apayao; Aurora; Batanes; Benguet; Cagayan; Ifugao; Ilocos Norte; Ilocos Sur; Isabela; Kalinga; La Union; Mountain Province; Nueva Vizcaya og Quirino.
Sumala sa Department of Interior and Local Government – Central Office Disaster Information Coordinating Center, posibleng makasinati ang mga nasangpit nga probinsiya og 7.5 millimeters/hour hangtud 15 mm/hr nga ulan.
Ang nasangpit nga pagbundak sa ulan posible nga molungtad og pipila ka oras.
