BUTUAN CITY- Gibutyag ni DSWD Secretary Rex Gatchalian, nasuta na sa mga social worker nga adunay discernment o adunay igo nga pagsabot ang gihimo sa 15-anyos nga suspek sa pagpamusil sa usa ka tunghaan sa Tacloban City nga gikamatay sa tulo ka estudyante.
Sumala niini, ang maong assessment gisumite sa korte, nga siyang magdesisyon kung dawaton kini isip usa ka basehan sa kaso. Gihuwatan usab sa DSWD ang resulta sa psychological assessment sa 15-anyos ug 14-anyos nga suspek aron makamugna og igo nga intervention program. Una nang nagpasaka og kasong kriminal ang mga awtoridad batok sa 15-anyos nga suspek, samtang exempted usab sa criminal liability ang 14-anyos ug gipa-ilawom sa Juvenile Justice and Welfare Act.
Ang duha ka minor-de-edad kasamtangang anaa sa Regional Rehabilitation Center for Youth. Dungan niini, sigon ni Gatchalian nga andam ang DSWD nga makigkoordinar sa paghisgot sa sugyot nga ubsan ang edad sa criminal liability. Matud pa sa Secretary, importanteng susihon kung kinahanglan bang amyendahan ang balaod o kung ang problema anaa sa implementasyon niini, hilabi na atubangan sa mga bag-ong hagit sama sa internet, bullying, ug uban pang risk factors.
