BUTUAN CITY – Nadugangan na usab ang kaso sa Covid-19 sa Caraga. Bag-ohay lang sa dihang gi-anunsiyo ni Dr. Jose Llacuna jr, Regional Director sa Department of Health kon DOH-Caraga nga nadawat nila ang 126 ka RT-PCR Results gikan sa GeneXpert TB Reference machine sa Molecular laboratory sa may Butuan Medical Center og Southern Philippines Medical Center.
Sa maong ihap 112 ang negatibo samtang 14 ang positibo.
Sa mga negatibo nga resulta, nagsumikad kini sa 6 nga suspected cases gikan sa Butuan Doctors Hospital, Maternity Hospital og Adella Sierra Ty Medical Center; 22 ka probable cases gikan sa Surigao Del Sur Quarantine Facilities;84 ka mga highly risk individuals nga dunay close contact sa nag-unang positibo sa virus.
Samtang sa 14 nga positibo, 9 niini ang dunay pangedarong 20-anyos ngadto sa 40 anyos; 18-anyos ang pinakabata og 60-anyos ang pinakatigulan. Sa maong ihap, 10 ang lalaki og 4 ang babaye diin usa ang Returning Overseas Filipinos kon ROF; 5 ang Locally Stranded Individuals kon LSI; 5 ang dunay close contact sa nagpositibo sa virus og 3 ang local transmission sa Butuan City diin usa niini ang health care worker.
Ang mga bag-ong positibong kaso nagsumikad sa Santiago, Agusan Del Norte nga dunay 2; Prosperidad-1; Tandag City-1; Bislig City-1; og Butuan City-9. Ang siyam ka kaso sa dakbayan, mga residente kini sa Barangay Ambago; Ampayon;Bayanihan; Mahogany;Pagatpatag;Tandang Sora; og Villa Kananga.
Sa mga positibong kaso, 8 niini ang asymptomatic kansa anaa na sa nagkadaiyang quarantine facilities alang sa monitoring samtang unom niini nagpakita og mild symptoms rasong gi-admit sa nagkadaiyang ospital ning rehiyon.
Sa pagkakarun, ang kaso sa Covid-19 sa Caraga misaka na sa 469 diin 334 ang nakarekober na, 127 ang pabiling aktibong kaso og dunay 4 nga namatay.
