BUTUAN CITY – Pursigido ang amahan sa usa ka 14-anyos nga dalagita sa Brgy. Tagabaca ning siyudad sa Butuan nga pasakaan og kaso ang pito ka mga batan-ong estudyante nga taga-Brgy. Pigdaulan nga mi-gang rape sa iyang anak ning nakalabay’ng semana.
Base kini sa pagsaysay ni Barangay Kapitan Nimfa Nalogon sa eksklusibong pakighinabi sa Bombo Radyo dungan sa pagbutyag nga na-ilhan sa biktimang gitago lang sa pangalang Gang-gang ang mga suspek uban sa iyang hinigugma nga mao matud pa’y saksi sa maong panghitabo.
Base sa report sa ilang barangay, nag-vigil matud pa ang biktima ug mga suspek sa boundary nilang Brgy. Pigdaulan kondiin nag-inom sila.
Sigon ni Kapitan Nalogon, didto nagdako sa iyang amahan sa Cebu City ang biktima ug mi-anhi sa Butuan tungod sa kamingaw sa iyang inahan human nagkabulag sa taas na nga panahon.
Na-refer na matud pa nila kini nga kaso ngadto sa Butuan City Police Station 4 ug sa City Social Welfare and Development ug naghulat na lang sila sa sunod nga lakang nga himuon sa mga otoridad.
