BUTUAN CITY – Mi-abot sa onse ka mga tunghaan ning siyudad sa Butuan ang gigamit nga evacuation centers tungod sa pagbaha na sa daghang mga barangay hatud sa padayon gihapon nga mga pagdagayday sa tubig-baha gikan sa Davao Region ug Agusandel Sur.
Sigon ni Emilio Makiling, ang Disaster Risk Reduction and Management kon DRRM coordinator sa Department of Education kon DepEd-Butuan City Division, puno-puno sa mga namakwit nga residenteng ang Butuan Central Elementary School, apil ang Agusan National High School, Agusan Pequeño ug ang Obrero Elementary Schools, base na sa iyang paglibot sa sentrong bahin ning siyudad kagabii aron personal nga masuta ang ilang sitwasyon.
Tungod niini, trabaho na matud pa sa mga school principals ang pagpahibalo sa ilang mga estudyante ilabina sa mga ginikanan kung unsa ang angayang buhaton aron dili ma-apektuhan ang pagtuon sa mga bata.
Samtang duna usa’y mga eskwelahan nga nabahaan sama sa Baan Riverside Integrated School apil ang ilang elementarya, rason nga apektado gihapon ang pagtungha sa mga kabataan.
Sa ingon niini matud pa nga sitwasyon, balik na sa modular learning ang mga magtutungha ug wala matud pa’y angayang kabalak-an tungod kay duna man sila’y mga modules nga ipanghatag.
Ang mga tunghaan nga wala’y mga bakwit ug wala nabahaan, balik na matud pa sa ilang normal nga klase.
