BUTUAN CITY – Nakuhaan og gibana-banang 10-gramos sa suspected shabu nga gitu-uhang nagkantidad og ₱68,000.00 uban sa usa ka kalibre .45 nga pistol ingon man mga bala ang usa ka high value individual kon HVI atol sa gihimong anti-illegal drug operations kaganinang alas-3:44 sa kaadlawon sa P-6 Brgy. Limaha ning siyudad sa Butuan.
Miresulta kini sa pagka-aresto ni alyas Wawang, lalaki, 44-anyos, duna’y ka-ipon, wala’y trabaho ug residente sa P-1 New Asia, Brgy. Fort Poyohon ning siyudad.
Nasikop si alyas Wawang human napalitan sa usa ka poseur buyer og usa ka selyadong transparent plastic sachet sa suspected shabu nga maoy gigamit nga buy-bust item timaan nga namaligya siya og mga ilegal nga druga.
Nakuha gikan sa iyang posisyon ang kinatibuk-ang 9 ka sachets sa susamang epektos, usa ka pistola uban sa usa ka magazine niini ug unom ka mga bala apil na ang ₱6,000 nga marked money.
Gikostudiya na karon ang suspetsado ug ang nakumpiskang mga butang sa Butuan City Police Office-City Drug Enforcemenmt Unit alang sa tukmang disposisyon.
