BUTUAN CITY- Misaka na sa 6,125 ang gidaghanon sa mga namatay tungod sa kambal nga linog nga miigo sa Venezuela niadtong Hunyo 24, sumala kini ni Venezuelan National Assembly Chief Jorge Rodriguez.
Ang magnitude 7.2 ug 7.5 nga mga linog maoy hinungdan sa pagkaguba sa hapit 200 ka mga building, ilabina sa coastal state sa La Guaira nga labing grabeng naapektuhan. Padayon gihapon ang pagpangita sa mga rescue team ug mga pamilya sa mga nalubong sa mga kagun-oban, samtang mikabat sa halos 17,000 ang mga naangol ug 1,400 pa ang gikatahong missing.
Gawas sa 190 ka mga building nga hingpit nga naguba, kapin sa 6,400 ka istruktura ang gideklarar nga delikado ug labaw sa 9,800 ang adunay limitadong paggamit tungod sa peligro.
Sa pagkakaron, dul-an sa 24,000 ka mga residente sa La Guaira ug Caracas ang nagpabilin sa temporaryong kapuy-an, samtang giaprobahan sa mga magbabalaod ang usa ka balaodon aron mapadali ang pag-abang og mga propiedad alang sa mga biktima sa linog, kansa naghulat na lamang sa pirma ni Interim Leader Delcy Rodriguez aron mahimong opisyal nga balaod.
