BUTUAN CITY – Nagpadayon ang imbestigasyon sa kapulisan sa natigayong pagpamusil bandang alas- 10:45 kagabii sa may Brgy. Tandang Sora, ning siyudad sa Butuan nga mikalas sa biktimang si Jethro Abion Tagulob, 42-anyos, minyo ug residente sa Purok Sari-Sari B, Brgy. Golden Ribbon ning siyudad.
Sigon ni Police Captain Namra Pandiin Arimao Jr, acting Station Commander sa Butuan City Police Station-1, pasado alas 11:00 sa gabii dihang nakadawat sila og tawag mahitungod sa pagpamusil rason gi-alerto niya ang mga beat patrollers nga maoy nakaresponde uban sa Butuan City Mobile Force Company.
Migawas sa ilang inisyal nga imbestigasyon nga naghulat nang daan ang mga suspek sa gawas nga bahin sa usa ka establisamiento sa dapit nga nahitabuan ug dihang mi-abot ang biktimang sakay sa iyang motorsiklo ka-uban ang iyang asawa, usa sa mga suspek ang miduol kaniya dayong pusil sa makadaghang higayon hinungdan sa iyang hinanaling kamatayon.
Daling naglusad og hot pursuit operation ang kapulisan kondiin ilang nadakpan ang usa sa mga suspek nga nailang si Jayson Teodoro Morales, 29-anyos, residente sa P-5, Brgy. Bancasi ning siyudad samtang at-large pa si John Rey Vitos, residente usab sa P-7, Brgy. Bading, ning siyudad.
Dugang ni Capt Arimao, nadakpan matud pa ang usa sa mga suspek dihang naglumba sila pag-iyahay og dagan human nga wala mu-andar ang ilang get-away motorcycle ug tungod kay anaa’y police beat patrollers sa dapit nga nahitabuan, daling gigukod ang usa sa mga suspek hinungdan sa pagkasikop niini.
Padayon pa ang ilang gihimong imbestigasyon aron masuta ang motibo sa pagpamusil ilabina nga ang nadakpang suspetsado, nakuhaan og mga plastic sachets apan wala’y sulod nga ilegal ng druga.
