BUTUAN CITY – Gipadayag sa mga tigduki-duki sa Estados Unidos nga ang usa lang ka nasal spray nga bakuna, posibleng makapanalipod na batok sa tanang klase sa ubo, sip-on ug trangkaso, lakip na ang bacterial lung infections, ug mahimo pa gani makatabang sa allergies.
Kini human nga ang team sa Stanford University misulay sa ilang gitawag nga “universal vaccine” diha sa mga hayop ug kinahanglan pa nga mohimo og human clinical trials. Ang ilang pamaagi usa ka radikal nga pagtalikod sa tradisyonal nga pagdisenyo sa mga bakuna sulod sa kapin 200 ka tuig.
Gibutyag sa mga eksperto nga ang pagtuon makapukaw kaayo sa interes bisan pa man og anaa pa kini sa sayong yugto ug posible nga mahimong dakong lakang pa-abante.
Nasayrang ang kasamtangang mga bakuna nagtudlo sa lawas sa pagbatok sa usa lamang ka espesipikong impeksyon sama sa measles vaccine nga manalipod lamang batok sa measles ug ang chickenpox vaccine batok lamang sa chickenpox.
Gihatag kini isip nasal spray ug nagbilin og mga white blood cells sa atong baga — nga gitawag og macrophages — nga anaa sa “amber alert” o andam sa paglihok bisan unsang impeksyon ang mosulod.
Sa mga eksperimento sa hayop, ang epekto milungtad og mga tulo ka bulan ug gipakita sa mga tigduki-duki nga kini mas andam nga nagresulta sa 100 hangtod 1,000 ka pilo nga pagkunhod sa mga virus nga makasulod sa baga ug sa lawas.
