BUTUAN CITY- Nagkauyon ang Estados Unidos ug Iran nga mo-stand down sa mga operasyon militar human sa sunod-sunod nga pag-atake sa naglabay nga mga adlaw, sumala sa US Officials.
Bisan paman niini, nagpabiling tensiyonado ang sitwasyon sa Strait of Hormuz tungod sa mga bag-ong pag-atake nga nagbutang sa ilang kasabutan sa hunong-buto sa peligro. Gipadayag sa US nga magpadayon ang mga negosasyon alang sa usa ka permanente nga kasabutan sa kalinaw samtang gawasnon na usab ang pag-agi sa mga barkong pangkomersiyal sa maong rutang pandagat.
Sa laing bahin, gilimod sa Iran ang mga report nga adunay teknikal nga panaghinabi karong semanaha, bisan og gibutyag ni US President Donald Trump nga adunay umalabot nga miting sa Doha, Qatar.
Samtang nagpadayon ang paningkamot sa diplomasya, nagpabilin usab ang tensiyon sa Lebanon diin nagpadayon ang panagbangi tali sa Israel ug Hezbollah, nga mahimong makaapekto sa mas lapad nga kasabutan sa hunong-buto sa rehiyon.
