BUTUAN CITY – Gikumpirma sa mga awtoridad sa Norway ang pinaka-unang kaso sa avian influenza o bird flu sa usa ka polar bear sa Europa human matumbok ang H5N5 strain sa Svalbard region sa Arctic.
Sumala sa Norwegian Veterinary Institute, nakaplagan niadtong Mayo ang patay’ng lawas sa usa ka lalaking polar bear nga gibana-banang anaa sa usa ka tuig palang ang pangedaron kauban ang usa ka walrus, sa nagyelong lugar nga kapin usa ka libo kilometros gikan sa North Pole.
Sa gihimong laboratory testing, migawas nga positibo sa H5N5 variant sa avian influenza ang mga sample gikan sa duha ka hayop.
Sigon ni Ragnhild Tonnessen, bird flu coordinator sa institute, makabalaka ang padayon nga pagtaas sa kaso sa virus sa mga mammal sa Europa.
Milapad na usab ang sakop sa virus hangtud sa Arctic, na mamahimong maghatud og kakuyaw sa mga sensitibong ecosystem ug wildlife population.
Sumala sa governor sa Svalbard, ang nadiskubrihan sa brain samples sa polar bear ug walrus dakong indikasyon nga bird flu ang posibleng hinungdan sa ilang pagkamatay.
Base sa datos sa World Organisation for Animal Health (WOAH), gibana-banang anaa sa 140 milyones ka hayop sa halos 70 ka nasud ang naapektuhan sa avian influenza sukad niadtong Enero 2025 hangtud sa Marso 2026, lakip ang mga namatay ug gipailalom sa culling.
Bisan og mas ubos kini kumpara sa peak outbreak niadtong 2021–2022, gibutyag sa mga eksperto nga mas lapad karun ang pagkuyanap niini sa mga mammal species, nga nagpataas sa kakuyaw sa posibleng mas lapad nga epekto sa wildlife ug pipila ka kaso nga naghatag og peligro sa mga tawo.
