BUTUAN CITY- Gituohang tungod sa depression human mitaliwan ang asawa ang hinungdan sa usa ka caretaker nga kutloon ang kaugalingong kinabuhi pinaagi sa pagpusil.
Naila ang biktima nga si Leonardo Jale 62-anyos balo ug residente sa purok -10 Brgy. Obrero ning syudad sa Butuan kinsa napalgang wala nay kinabuhi sulod mismo sa Obrero City training Center alas 4:10 ang takna sa kabuntagon kagahapong adlawa.
Sa imbestigasyon sa kapulisan, nasuta nga gikutloan matod pa sa biktima ang kaugalingong kinabuhi pinaagi sa pagpusil gamit ang 38 revolver kansa gisulod sa iyang baba dayong paboto.
Sumala usab sa anak sa biktima , nakasinati matod pa og depression ang ilang amahan human mitaliwan sa laing kalibutan ang ilang inahan.
Dinhi nabatayan matod pa sa anak nga daw wala nay gana nga mabuhi ilang amahan, apan wala sila magdahom nga kutluon niini ang kaugalingong kinabuhi.
Gisulayan pa og dala sa usa ka pribadong ospital ang biktima, apan gideklarang kining patay na.
Gikatakda usab magpahigayon og ballistic examination ang kapulisan aron sutaon kung aduna bay foul play sa kamatayon sa biktima.
Gilayon usab kining gilubong human nasuta nga nagpositibo kini sa Coronavirus Disease 2019 kon COVID-19 human gipailalom sa swab test.
