BUTUAN CITY – Gi-deploy na sa Philippine National Police kon PNP ang ilang tracker teams aron ipatuman ang arrest warrant nga gi-isyu sa International Criminal Court batok kang Senador Ronald dela Rosa.
Sumala ni PNP chief Gen Jose Melencio Nartatez Jr., ang pagpangita sa senador subay sa hugot nga operational rules ug pagrespeto sa due process.
Sigon sa PNP chief, gimandoan na ang tanang yunit nga nalambigit sa operasyon nga magpakita og maximum tolerance ug propesyonalismo sa tibuok operasyon.
Ang deployment misunod sa direktiba ni Justice Sec Fredderick Vida nga nagmando sa PNP ug sa National Bureau of Investigation nga ipatuman ang pagdakop kang Dela Rosa base sa ICC warrant.
Gitawag ni Vida ang senador nga usa ka “fugitive from justice” nga kinahanglan dad-on sa The Hague aron atubangon ang mga kaso batok kaniya.
Sigon ni Vida, gibase niya ang maong mando sa ICC warrant nga nagngalan kang Dela Rosa isip co-perpetrator sa drug war, apil na ang iyang paggawas sa kustodiya sa Senado, wala pag-isyu sa Korte Suprema og temporary restraining order batok sa warrant, ug ang pagpatuman sa warrant ubos sa balaod sa Pilipinas.
Gipasabot sa kalihim nga lahi sa pagdakop kaniadto kang kanhi Pangulong Rodrigo Duterte niadtong Marso 2025 nga gi-trigger sa Interpol notice, ang aksyon batok kang Dela Rosa karon nakabase sa lokal nga balaod — ang Republic Act 9851 o Philippine International Humanitarian Law — nga nagtugot matud pa sa gobyerno nga itugyan diretso ang mga suspek ngadto sa usa ka international tribunal.
