BUTUAN CITY- Dako ang garbo ug kalipay sa Team Caraga human sa ilang talagsaong kalampusan sa Arnis Likhang Anyo Competition nga gipahigayon sa Agusan del Sur Electric Cooperative, Inc. kon ASELCO Gym, San Francisco, Agusan del Sur niadtong Mayo 26 hangtud Mayo 27, 2026 isip kabahin sa 2026 Palaro Tu AgSur.
Nakasungkit ang rehiyon og pito ka gold medals, usa ka silver, ug unom ka bronze medals sa nagkalain-laing kategorya, kansa nagpamatuod sa kusog ug kahusayan sa mga Caraganon arnisadors. Gipakita sa mga atleta ang disiplina ug artistic execution sa synchronized forms, espada y daga, ug double weapon performances diin gisukod ang timing, precision, coordination, ug control. Ang matag medalya usa ka bunga sa walay kapoy nga ensayo, dedikasyon, ug suporta gikan sa mga coaches, trainers, ug pamilya.
Bisan pa sa kadaugan, padayon pa ang paningkamot sa Team Caraga tungod adunay napulo pa ka gold medals nga pagailogan sa umaabot nga Arnis combative events karong adlawa hangtud ugma 29, diin gilauman nga mas madugangan pa sa medal tally ug mapadayon ang pagsidlak sa Caraga sa Palarong Pambansa.
