BUTUAN CITY – Tingkagol sa bilangguan ang usa ka tattoo artist lakip na ang iyang kapuyo human ang implementasyon sa search warrant pasado alas 6:30 kagabii sa may Purok Tanguile, Barangay Pangabugan ning siyudad sa Butuan.
Naila ang nadakpan nga sila Marvin Sucia, 26-anyos, usa ka tattoo artist og live-in partner niini nga si Mary Cris Contadan, 21-anyos nga parehong residente sa maong dapit.
Nakuha gikan sa ilang posisyon ang duha ka sachet nga dunay sulod sa gitoohang shabu nga mitimbang og punto singko gramos nga dunay market value nga 3-mil, 400 pesos.
Nakumpiska usab ang nagkada-iyang klase sa drug paraphernalia apil na niini ang jumbo roll sa aluminum tin foil, duha ka units sa cellular phone og cash nga muabot sa 800 pesos sa nagkada-iyang denominasyon.
Ang suspetsado ug ang mga nakumpiskang ebidensiya gikustudiya kini sa City Intelligence Unit sa Butuan City Police Office alang sa tukmang disposasyon samtang gihikay ang kasong ilang atubangon.
Sa eksklusibong pakighinabi ning sibyahan kang Belinda Taliktik, igsoon sa target nga si Marvin, giklaro niini nga wala sila magtoo nga milambigit sa pagpamaligya og paggamit sa ilegal nga drugas ang ilang igsoon.
Ang ilang nailhan nga palahubog lang kini nga maoy gika-konsimisyunan usab sa ilang inahan.
