BUTUAN CITY – Padayon karung milihok ang Task Force Awas aron matubag ang problema sa mga Butuanons mahitungod sa krisis sa tubig.
Sigon ni Michiko De Jesus, tigpamaba sa Butuan City Government, niadto pang higayon nga gipa-ilalom sa state of calamity ang siyudad gimugna ang Task Force Awas nga gipangunahan mismo sa Butuan City Water District kon BCWD ug uban pang mga ahensiya sa gobyerno sama sa lokal nga panggamhanan sa siyudad.
Tumong sa Task Force Awas nga matabangan ang BCWD sa panginahanglan aron dunay lahi nga sources sa tubig diin duna nay mga lugar nga gi-water testing.
Lakip sa target nga mahimong operational ang 4 ka water pumping stations, makapalit ug mga tankers og jetmatic pumps nga mahatag ngadto sa mga barangay.
Gitabangan usab ang BCWD sa pagsulat ngadto sa Bureau of Soil aron hatagan sila og permit nga mohimo og cloud seeding. Alayon niini, giawhag sa opisyal ang katawhan nga pabukalan ang tubig nga madawat sa gihimong rasyon ilabina kung kini imnon alang sa kaluwasan sa panglawas.
Gawas kini sa paghimo og rainwater harvesting samtang sa higayong naka-schedule nga mo-agas ang gripo, kinahanglan gayud nga magpondo ug tubig.
Gikumpirma usab ni De Jesus nga dunay lahi nga komitiba nga mihimo og planning workshop og strategic plan sugod kagahapon hangtud karun may kalabutan sa La nina phenomenon.
