BUTUAN CITY – Nangandam na ang Taiwan, China, ug Japan sa pag-abot sa Bagyong Inday nga adunay international name nga Bavi, nga gila-umang magdala og grabe nga mga pag-ulan ug kusog nga hangin sa rehiyon.
Sumala sa mga weather authorities sa Taiwan, posible nga magdala ang bagyo og hangtod usa ka metro nga ulan sa pipila ka lugar.
Kapin sa 29,000 ka mga sundalo ang alerto aron motabang sa mga posible nga rescue ug relief operations labina nga gila-uman nga kini na ang pinakadakong bagyo nga moigo sa Taiwan, base sa kalapad niini, sukad niadtong tuig 1987.
Sa China, nagpasidaan usab ang mga otoridad nga mahimong adunay dakong epekto ang Bagyong Bavi kung mu-igo kini sa probinsya sa Fujian.
Nangandam na usab ang mga residente sa habagatan sa Japan, lakip na ang Sakishima Islands, sa posible nga paghapak sa bagyo.
Samtang gikansela na sa pipila ka airlines ang gatusang mga biyahe tungod sa daot nga panahon. Lakip niini ang Japan Airlines, All Nippon Airways, Thai Airways, ug Malaysia Airlines, nga nakaapekto sa libo-libong pasahero.
Padayon nga gipasidan-an ang mga residente sa mga apektadong lugar nga sundon ang mga abiso sa ilang lokal nga awtoridad ug mag-andam sa posible nga paghikling kung kinahanglanon.
