BUTUAN CITY – Hangtud sa pagkutlo ning balita, gihulat pa sa kapulisan sa Carmen, Agusan Del Norte ang kabanay sa biktima sa hit-and-run human hingpit nga mailhan ang suspetsado pinaagi sa social media.
Saysay pa ni Police Inspector Allan Roy Villegas, Officer-in-charge sa Carmen Municipal Police Station niadto pang Oktubre 15 nahitabo ang aksidente nga naglambigit sa duha ka single motor, usa ka multicab ug usa ka puting van sa may Rojales mga bandang alas 3:20 sa hapon.
Nabanggan sa mi-overtake nga puting van ang kasugat nga single motor hinungdan sa pagkapatay sa biktimang si Mardy Costillas, 23-anyos, olitawo, usa ka seaman nga taga Barangay Tagcatong, Carmen, Agusan Del Norte samtang kritikal usab si Gerald Banagan nga residente usab sa maong dapit.
Mipatoratoy usab sa pagpadagan ang naka-disgrasya nga van. Sa gihimung imbestigasyon sa kapulisan, nakuha sa CCTV ang van apan tungod kay dili maklaro ang plate number niini ug drayber, gipost nalang kini sa facebook.
Pipila ka adlaw ang milabay dunay midangop sa kapulisan og mi-asuy nga nakaila siya sa maong van nga dali usab nga gihatagan ug pagtagad sa otoridad.
Sa pagresponde, hingpit nga nailhan ang suspek nga si Arnold Buhisan, taga Magsaysay, Misamos Orientad ug igsoon sa mayor sa maong dapit.
Sumala pa ni Police Inspector Villegas nga gi-angkon mismo sa suspek nga siya ang nagmaneho sa maong sakyanan.
Gihangyu pa sa pulis ang suspek nga modalikyat sa sibyahan alang sa iyang kabahinan apan abogado lang niini ang gipa-adtu.
Samtang sa karun, gi-andam nang daan sa otoridad ang mga dokumento sa pagpasaka ug kaso human misaad ang kabanay sa biktima nga asikasuhon nila ang pagpasaka ug tukmang kaso human sa pagpalubong sa biktima.
