BUTUAN CITY – Nagtingkagol na sa prisuhan ang suspetsado sa ngil-ngig nga pagmasaker sa tibook pamilya sa barangay Litapan, Josefina, Zamboanga del Sur.
Naila ang suspetsado nga si Frank Barcelona Camiguing, 23 anyos ug residente sa Barangay Panagaan, Mahayag, Zamboanga del Sur.
Kini human nasikop pinaagi sa subsob nga hot pursuit operation sa Josefina Municipal Police Station (MPS) kauban ang Zamboanga del Sur Police Provincial Office (ZSPPO) ug mga sundalo sa 53rd Infantry Battalion.
Ang suspetsadong si Camiguing anaa na karon sa kustodiya sa Josefina Municipal Police Station samtang giandam pa sa mga imbestigador ang pagpasaka og mga kasong kriminal batok kaniya.
Gibutyag usab sa kapulisan nga ang suspetsado duna nay giatubang nga kasong Qualified Theft kaniadto sa Regional Trial Court Branch 23 sa Molave.
Ang pagkaaresto nagtimaan og dako nga kalamboan sa imbestigasyon sa brutal nga masaker nga nakapakurat sa probinsya niadtong Hunyo 29, dihang nadiskobrehan sa mga awtoridad ang walay kinabuhi nga lawas ni Arlene Fernan Dumalte, 42-anyos, usa ka Barangay Health Worker (BHW), ug sa iyang tulo ka anak nga pulos minor-de-edad sulod sa ilang pinuy-anan.
