BUTUAN CITY – Nagtingkagol na karun sa prisuhan ang usa ka senior citizen nga responsable sa pagpamusil-patay sa nakalabay nga gabii sa may Purok 8, Barangay Taglatawan, Bayugan City diin ang biktima usa ka negosyante.
Kini human nga daling nasikop sa gikasang hot pursuit operation sa kapulisan ang suspek nga si Rolando Hayag Arsenio, 67-anyos, ug residente sa naasuy’ng lugar.
Base sa impormasyon, natigayon ang pagpamusil pasado alas 9:55 sa gabii diin nakadawat nalang ang kapulisan og tawag gikan sa nagpakabanang residente rasong daling miresponde ang mga personahe sa Bayugan City Police Station.
Ang biktima nga nailang si Alejandro Calang, 49-anyos usa ka negosyante gidala pa sa ospital human sa pagpamusil apan gideklara kining dead on arrival sa mi-atendar nga doktor.
Gilusad gelayon ang hot pursuit operation og nadakpan ang suspetsado samtang narekober sa iyang posisyon ang usa ka kalibre punto 45 nga pistola uban sa magazine.
Base sa inisyal nga imbestigasyon, ang dugay nang bangi ang gitoohang maoy hinungdan sa pagpamusil.
Gikustudiya na sa Bayugan City Police Station ang suspek samtang gipasaka ang tukmang kaso.
