BUTUAN CITY – Nisaad ang state witness nga si Kanhe Department of Public Works and Highways (DPWH) Undersecretary Roberto Bernardo nga ibalik niya ang katibuk-ang Uno Bilyones pesos sa kaban sa katawhan isip bahin sa restitution nga bugti sa iyang pagkasulod sa Witness Protection Program (WPP) ug pagtestigo sa mga anomaliya sa mga flood control projects.
Una nang nakauli og 500 milyones pesos si Bernardo ngadto sa gobyerno.
Sa iyang testimonya sa bail hearing sa kaso ni kanhe Senador Ramon Revilla Jr. ug uban pang akusado sa kasong malversation sa Sandiganbayan, giangkon ni Bernardo ang iyang papel sa umano’y korapisyon sa mga proyekto, lakip na ang sa Pandi, Bulacan ug nagpasabot nga nagbasol siya sa iyang pagka-apil sa sistema.
Gihisgutan usab ni Bernardo angtres milyones pesos nga cash deliveries nga ihatag ni Revilla niadtong 2024-2025.
Gipahayag ni Bernardo nga nangayo si Revilla og 25% nga commitment alang sa mga infrastructure projects, apil na ang ghost flood control project sa Pandi, Bulacan.Giingon pa ni Bernardo nga gisugo siya ni Revilla nga makig-koordinar kang kanhe DPWH Secretary Manuel Bonoan ug ang mitaliwan nga si DPWH USec. Catalina Cabral aron masiguro nga masulod ang proyekto sa 2025 General Appropriations Act (GAA) sa Pandi, Bulacan.
