BUTUAN CITY – Gimanduan na ni Department of Environment and Natural Resources kon DENR-Caraga Regional Executive Director Atty. Felix Alicer si CENR Officer Victor Sabornido paglusad og imbestigasyon kalabot sa napadpad nga patay nang 17-metros nga sperm whale napalgan sa usa ka mangingisda sa baybayon sa Sitio Gacubay, Barangay Baculin, Hinatuan, Surigao del Sur.
Gibutyag ni DENR-CARAGA Information Officer Eric Gallego sa eksklusibong pakighinabi sa Bombo Radyo Butuan nga angayang masayran ang hinungdan sa kamatayon sa maong balyena nga nakapalgan nang anaa na sa state of decomposition.
Apil sa susihon kung nakakaon ba kini og plastic nga gipanglabay sa kadagatan ilabina nga sunog ang likod niini.
Gidugang sa opisyal, anaa na sa brink of extinction ang nakaplagang balyena hinungdang angayan kining ampingan.
