BUTUAN CITY – Gigraduhan og 3 ni Kabataan Partylist Representative Raoul Manuel ang State of the Nation Address kon SONA ni Pangulong Ferdinand ‘Bongbong’ Marcos Jr.
Sa eksklusibong pakighinabi sa Bombo Radyo Butuan, gipadayag ni Congressman Manuel nga ang nasangpit nga grado alang lamang sa mga paningkamot ni Pangulong Marcos sa pagbuhat sa mensahe ug dili sa unod niini.
Gikonsidera ni Rep. Manuel nga motherhead statement ang SONA diin nindot kaayung paminawon apan walay giyagyag nga lakang aron kini mareyalisar samtang ang kadaghanan sa gibutyag niini, daan na matud pa nga mga programa sa mga ahensiya sa gobyerno rasong makonsiderang walay direksiyon ang administrasyon.
Gitumbok pa sa opisyal ang kawala’y priority bills alang sa iyang mga plano sama na lang ang alang sa edukasyon diin ablihan ang face-to-face classes apan wala man la’y pondo nga gibutyag niini aron masegurong luwas ang mga tunghaan alang sa mga kabataan.
Apil sa gisaway niini ang sugyot pagbalik sa mandatory Reserved Officer’s Training Corps kon ROTC nga wala nahiuyon ug dili usab matud pa dapat ipatuman.
Dugang pa ni Rep. Manuel, gi-angkon usab sa pangulo ang ta-as na nga presyo sa mga palaliton karon apan wala man lama’y solusyon kining gilitok ilabina sa pagpataas sa suhulan sa mga mamumu-o.
