BUTUAN CITY – “Circuit Breaker “ ang gipatuman sa Singapore human ang pag-ulbo sa coronavirus disease 2019 kon COVID-19.
Sa pakighinabi sa Bombo Radyo Butuan kang Rolly Padilla lumad nga taga-Brgy. Bawbawan ning siyudad sa Butuan ug 15 ka tuig nang Overseas Filipino Workers sa Singapore, gipadayag niining “circuit breaker” kon partial lock down ang gipatuman sa maong nasud sugod adtong Abril 7 diin hunong na usab ang tanang trabaho gawas lamang sa mga tindahan sa mga pagkaon, parmasya ug bangko.
Duna gihapo’y biyahe sa public transportation dungan sa pagpadayag nga gi-obserbara gihapon ang mga health protocols sama sa pagsuot ug face mask ug social distancing.
Gipadayag niining taliwala nga stay at-home lamang sila, wala’y angayang kabalak-an sa ilang pagkaon tungod kay nagadawat gihapon sila og sweldo gawas nga hinatdan usab sila og pagkaon sa gobyerno sanglit gidid-an naman sila sa pagluto-luto.
Gipadayag usab niini nga walay magbagulbol nga indibidwal sa Singapore tungod libre man ang tanan gikan sa hygiene kit hangtod sa pagkaon rason nga kamingaw lang ang ilang kaaway tungod sa hulga sa maong sakit.
Gidugang ni Padilla gihikay na sa gobyerno sa Singapore ang floating hotel diin didto ibutang ang mga idibidlwal nga magpositibo sa coronavirus.
