BUTUAN CITY – Gipangunahan ni Atty. Francisco Pobe, ang Regional Election Director sa Commission on Elections kon COMELEC-Caraga Region ang Simultaneous Nationwide Multi-Sectoral Peace Assembly alang sa Barangay ug Sangguniang Kabataan elections kon BSKE 2023.
Kini isip guest of honor ug speaker sa flag-raising ceremony sa Police Regional Office kon PRO-13 kaganinang buntag.
Sa iyang pagpamulong, gipadayag ni Pobe nga 85-porsiento na silang andam sa umalabot nga eleksyon nga himuon karong Oktubre 30.
Karong adalwa matud pa ang shipment sa mga official ballots alang ning rehiyon apil na sa uban pang mga election paraphernalia dungan sa panghinaut nga unta wala’y mga kakulian kining masugatan.
Direkta matud pa kining ipanghatud ngadto sa mga provincial treasurer’s offices ning rehiyon ingon man ngadto na sa municipal treasurer’s offices.
Apil sa ilang gikabisihan karon mao ang pagpatuman na sa hugot nga siguridad ka-uban ang kapulisan ug kasundaluhan aron masiguro ang hapsay ug malinawong eleksyon.
Malipayon usab nga gipahibalo ni Atty. Pobe nga wala maka-abot ang Caraga Region sa red category base na sa assessment sa kapulisan ug kasundaluhan.
Kini tungod kay mayoriya sa mga lugar ning rehiyon nga ilang gi-monitor base sa mga panghitabo sa mi-aging mga eleksyon, anaa man sa green category.
