BUTUAN CITY – Tumang kasubo ang gibati sa pamilya Valenzuna sa may Brgy. Aupagan ning siyudad sa Butuan human namatay sa pagkasunog sa ilang pinuy-anan pasado alas-nueve kagabii ang magti-ayong senior citizen.
Naila ang mga biktimang sila Cepriano Valenzuna, 93-anyos ug ang asawa niining si Isidra Valenzuna, 86-anyos.
Sa eksklusibong pakighinabi ning sibyahan, gibutyag sa apo sa mga biktima nga si Gary nga ang mga biktima lang ang nagpuyo sa ilang panimalay apan silingan ra sila.
Nakurat na lang sila dihang nagkayagaw na pagpaninggit ang ilang mga silingan tungod sa pagkasunog sa balay sa iyang mga apuhan.
Saysay ni Gary, bisan og edaran na ang duha apan wala matud pay problema sa ilang paglakaw ug hayan tungod lang sa kapaspas pagkaylap sa kalayo rason sa ilang nadangatan.
Naka-abot pasa pultahan ang iyang lola apan wala na nila kini maluwas pa tungod sa kapaspas sa mikaylap nga kalayo.
Bisan og gitu-uhang tungod sa gidagkutan nga katol ang hinungdan sa pag-ulbo sa kalayo apan padayon pa ang imbestigasyon aron masuta gayod kung asa gikan ang kalayo.
Gidugang pa ni Gary nga bisan og iyang lolo ug lola na lang ang nagpuyo sa nasunog nilang panimalay apan kada-adlaw kini nilang bisitahan gawasna lang sa pagkagabii diin sila lang ang matulog sa ilang pinuy-anan.
