BUTUAN CITY – Dili pirmahan ni Senadora Imee Marcos ang partial report sa Senate Blue Ribbon Committee may kalabutan sa ilang gihimong imbestigasyon sa mga anumalusong flood control projects.
Kini tungod kay kulang ang gihimong imbestigasyon sa maong komite ilabina sa mga tawong angayang maoy imbestigahan kinsa maoy gitudlo sa mga testigo sa mi-aging mga pagdungog.
Madumdumang subling nanawagan si Senate Blue Ribbon Committee chairman Ping Lacson sa iyang mga ka-ubanan sa Senado nga pirmal ang partial report human kini nakakuha og upat lang ka pirma.
Gipadayag pa ni Lacson nga abli ang maong report sa interpelasyon sa iyang mga ka-ubanan kondiin mahimo matud pa silang manguta ug mag-amyenda kung gikinahanglan.
Apan sigon sa senadora, makunbinsi lang siyang mupirma sa initial report kung muhimo og full investigation ang komite sa kinatibuk-ang mga anumalusong flood control projects sa nasud.
Ang kakulang sa unod sa partial report nga maoy nakapadismaya kanila, ang hinungdan nga mihimo sila ni Senador Rodante Marcoleta og ilang minority report tungod sa wala pagtumbok sa mga tawong gitudlo sa mga testigo nga maoy nagpaluyo sa lapad nga anomaliya kansa klarong gitabunan sa komite sama sa iyang ig-agaw nga si Rep Martin Romualdez.
