BUTUAN CITY – Padayon karon ang search and rescue operation sa mga tauhan sa Municipal Disaster Risk Reduction and Management Office (MDRRMO) sa lungsod sa Tubajon, probinsya sa Dinagat Islands, kauban ang ubang national line agencies sama sa Philippine National Police (PNP), Bureau of Fire Protection (BFP), ug Philippine Coast Guard (PCG).
Kini aron pangitaon ang mga sakay sa nahagsa nga Cessna 182 Skylane nga adunay tail number RP-C2444 sa may Brgy. Navarro sa maong lungsod kagahapon, Miyerkules, Abril 8.
Nasayran nga nawala sa radar ang maong eroplano kagahapon sa hapon sa wala pa kini nakita sa maong lugar, base usab sa mga pahayag sa mga residente nga nakadungog og kusog nga pagbuto mga ala-una sa hapon.
Nagpadala na si Dinagat Islands Governor Nilo Demerey, Jr. og Incident Management Team (IMT) kauban ang mga drone technical personnel aron motabang sa aerial assessment, mapping, ug pagpangita sa mga sakay niini.
