BUTUAN CITY – Nagpagawas na og official statement ang Regional Task Force koN RTF for COVID-19 One Caraga Shield kalabot sa pagpa-uli na sa mga estudyante sa Mindanao State University kon MSU sa Marawi City ug sa Iligan City human ang epektibong implementasyon sa ‘Balik Estudyante Program’ nga gipasi-ugdahan sa Land Transportation, Franchising and Regulatory Board kon LTFRB-Caraga niadtong Domingo, Mayo 17.
Sa statement nga gipirmahan ni One Caraga Shield chairman ug Agusan del Norte Governor Dale Corvera, gipadayag niining dili sayon nga tahas ang pagdala sa maong mga estudyante pa-uli sa ilang tagsa-tagsa ka pinuy-anan ilabina sa hagit sa koordinasyon nga ilang nabagatan.
Aminado ang One Caraga Shield nga kini nga pandemic nagtudlo kanato og leksyon nga wala’y makalabaw sa nagkahi-usang katawhan nga mibarog isip usa.
Nasayrang kapin sa duha ka buwan nang nakigbatuk ang Caraga sa maong pandemic dili isip usa ka probinsya o kaha siyudad apan isip usa ka hini-usang rehiyon.
Kini matud pa ang hinungdan nga gidayeg ang atong rehiyon ni chief implementer Secretary Carlito Galvez isip rehiyon nga ha-um sundugon sa uban niini nga pakigbisog. Mi-apela sila sa tanang Caraganons nga magpasalamat ug magpa-ilob sa matag-usa ning panahon sa kalisdanan.
Kini usab ang panahon sa mga pagsulay dili lamang diha sa atong panglawas ug mga tuburan apan apil na sa paagi sa pakiglambigit sa usa’g usa.
Kinahanglan matud pang dili mu-define kanato ang mga borders apan ang atong gi-ambitang tinguha ug paglaum nga mahimong COVID-19 free region maoy maghimo kanatong mas lig-on sa atong panaghi-usa.
Gi-awhag sa chairman ang tanan nga likayan na ang pag-post sa social media og mga pamahayag nga maoy magbahin-bahin kanato ug sa atong rehiyon.
Kinahanglan matud pa natong maghi-usa ug magpakalig-on isip ‘One Caraga’ ilabina nga atubangon nato ang pandemic isip ‘ONE and TOGETHER, We Heal as One.’
