BUTUAN CITY – Patay na si Felicien Kabuga, usa sa mga nag-unang suspek sa 1994 Rwandan genocide, samtang nag-atubang pa sa pagtaral sa International Criminal Court (ICC) sa The Hague, base sa pagkumpirma sa United Nations.
Sigon sa International Residual Mechanism for Criminal Tribunals, namatay si Kabuga sa usa ka ospital niadtong Sabado, Mayo 16, sa edad nga 90-anyos.
Dugay na siyang gi-isip nga usa sa mga gipangitang pugante sa tibuok kalibutan tungod sa iya matud pang papel sa pagpondo ug pagsuporta sa genocide sa Rwanda niadtong 1994, diin gibana-banang 800,000 ka tawo ang namatay sulod lang sa pipila ka bulan.
Gipasanginlan si Kabuga nga usa sa mga nagpaluyo sa Radio-Television Libre des Mille Collines (RTLM), usa ka estasyon sa radyo nga nag-aghat matud pa sa mga ethnic Hutu nga patyon ang mga Tutsi atol sa genocide.
Gitu-uhan usab nga siya ang nanghatag og mga machete ug misuporta sa mga grupo nga nalambigit sa lapad nga pagpamatay.
Niadtong tuig 2020, nadakpan si Kabuga sa Paris human sa hapit tulo ka dekada nga pagtago-tago gamit ang lain-laing peke nga identity ug pasaporte.
Human sa iyang pagkasikop, gibalhin siya sa The Hague diin gi-atubang niya ang mga kaso sa genocide, conspiracy to commit genocide, incitement to genocide, ug crimes against humanity lakip na ang murder ug extermination kansa iyang gipanghimakak dayong duso og not guilty plea sa korte.
Niadtong 2023, gipahunong sa mga huwes ang pagtarak kaniya human gideklarang dili na siya angay taralon sa korte tungod sa pisikal ug mental incapacity niini.
Gimando usab sa presiding judge nga si Graciela Gatti Santana ang mas lawom nga imbestigasyon sa hinungdan ug kahimtang sa pagkamatay ni Kabuga.
