BUTUAN CITY – Luwas nga nakabalik sa Pilipinas ang 34 ka overseas Filipino workers (OFWs) ug usa ka dependent gikan sa Qatar niadtong Sabado, Mayo 16, isip kabahin sa repatriation efforts sa gobyerno alang sa mga Pilipinong naapektuhan sa nagkagrabeng tensyon sa pipila ka bahin sa Middle East.
Miabot ang grupo sa Ninoy Aquino International Airport (NAIA) Terminal 3 sa Pasay City sakay sa Qatar Airways Flight QR934, sumala sa Department of Migrant Workers (DMW).
Gisugat ang mga repatriates sa mga representante gikan sa Department of Migrant Workers, Overseas Workers Welfare Administration (OWWA), ug mga medical personnel sa Manila International Airport Authority (MIAA), uban sa New NAIA Infrastructure Corporation.
Gihatagan dayon og assistance ug gi-assess ang mga OFWs aron maseguro ang hapsay nilang pagbalik sa nasod.
Sumala sa mga awtoridad, padayon nga ginamonitor sa gobyerno ang sitwasyon sa Middle East tungod sa nagkagrabeng tensyon ug kagubot sa rehiyon, nga maoy hinungdan nga daghang OFWs ang nangayo og tabang aron makapauli sa Pilipinas.
Una nang giingon sa Department of Migrant Workers nga nakadawat sila og daghang requests alang sa repatriation gikan sa mga Pilipino nga naa sa mga apektadong lugar samtang nagkasamot ang tensyon sa rehiyon.
Tungod niini, gipahayag sa ahensya nga andam ang ilang contingency measures ugaling kinahanglanon ang mas lapad nga evacuation operations.
