BUTUAN CITY – Nahimong mabulukon ug dili makalimtan ang pagreklamo unta sa usa ka ginang uban sa iyang mga anak batuk sa iyang bana ngadto sa police station sa Nasipit, Agusan del Norte.
Nasayrang pasado alas-dies ning mi-aging gabii dihang kamulo na og interview ang duty personnel sa maong police station ngadto sa mireklamong misis, didto na nahibal-an nga gisa-ulog diay sa 17-anyos niining anak nga si Princess Abegail Gaslang, nga taga-Purok 1, Brgy. Ata-atahon, ang iyang adlaw’ng natawhan.
Tungod niini, gihatagan og birthday cake ug snacks ni PCaptain Franklin Lacana – acting chief of police, ang dalagita.
Dinhi imbes nga kalagot ang ma-aninaw sa dagway sa dalagita, makita ang iyang gibating kalipay tungod sa espesyal nga okasyong kalit lang gidalit kaniya taliwa sa ilang gipa-abot nga problema.
Gisaw-an nila sa iyang inahan ug mga igsoon ang gidalit kanilang birthday treat.
