BUTUAN CITY – Gitin-aw ni Atty. Francisco Pobe, Regional Director sa Commission on Elections kon COMELEC-Caraga nga wala’y angayang kabalak-an sa iyang kahimtang sanglit anaa siya sa maayong kondisyon human nagpositibo sa coronavirus disease 2019 kon COVID-19 ug maglima ka adlaw nang isolated.
Gipadayag sa opisyal nga asymptomatic hinuon kon wala siya’y gibati nga bisan unsang simtomas sa sakit ug normal ang iyang temperatura rason nga wala siya’y gi-inom nga bisan unsang tambal.
Sa pikas bahin, nakatala pa og 32 ka mga bag-ong kaso sa COVID-19 ang Caraga Region kagahapong adlawa hinuon walay patay. Base sa listahan sa DOH-Center for Health Development Caraga, gilangkuban ang 32 ka mga bag-ong kaso sa 21 ka mga babae samtang 11 ang mga lalake diin 13 anyos ang pinaka-bata ug 79-anyos ang pinaka-edaran.
Nag-una ang Bislig City sa dunay pinakadaghang bag-o nga kasong natala nga anaa sa 12; samtang nadungagan usab og pito ka kaso ang Butuan City samtang lima sa Buenavista, Agusan del Norte.
Nakatala usab og tulo ka kaso ang Agusan del Sur ug duha usab ka bag-ong kaso ang Hinatuan, Surigao del Sur ingon man tag-usa ka kaso sa Tandag City ug Surigao City.
Sa 32 ka mga bag-ong kaso 30 niini ang gi-classify nga mga local transmission ug duha ka mga Locally Stranded Individuals.
Tungod niini milansang na sa 7,145 ang kinatibuk-ang kaso sa COVID-19 sa rehiyon apil na niini ang 866 ka mga aktibo pang kaso samtang miabot pa sa 5,991 ang ihap sa mga nimaayo ug 288 na ang mga namatay.
