BOMBO BUTUAN – Gipasibaw sa usa ka magtutudlo sa pribadong tunghaan ning siyudad sa Butuan ang matud pa, dili patas nga protocol nga gipatuman sa mga nag-man sa quarantine facility sa may Jose T. Domingo Sr. Central Elementary School.
Sa reklamong gipa-abot sa magtutudlong gitago ang sa alyas nga Titser Dolly, gipasabot niining 14 sila ka mga magtutudlong gi-quarantine sa maong pasilidad nga usa ka semana na karong adlawa human nahimong first generation sa ilang ka-uban nga nagpositibo sa COVID-19.
Boluntaryo matud pa silang midalikyat sa maong pasilidad isip pagtamod sa protocol apan gi-quarantine sila taliwa nga nagnegatibo sila sa swab test.
Ang ilang gikahibulungan tungod kay ang ilang ka-ubang nagpositibo sa coronavirus dihang gidala sa Butuan Medical Center kon BMC tungod sa mga gibati niining simtomas, gitugutan nga mag-home quarantine.
Dihang ila kining nasayran, mihangyo matud pa sila sa nagdumala sa maong pasilidad nga tugutan usab silang mag-home quarantine aron makahimo gihapon sila sa ilang trabaho sa ingon magpadayon ang ilang pagtudlo sa mga bata gamit ang distance learning.
Apan wala matud pa sila gisanong sa management sa facility sa rason nga kinahanglang monitoron kanunay ang ilang panglawas.
Ang nakadugang sa ilang gikadismaya tungod kay wala matud pa’y regular nga monitoring sa ilang kahimtang gani bisan sa pagkuha sa ilang temperatura, ka-usa sa usaka adlaw lang kini himuon ug sundan pagkasunod adlaw na.
Dili matud pa sila makahimo sa ilang trabaho tungod sa kahinay kaayo ang wi-fi connection nga bisan sa messenger, dili sila makapadala og mga mensahe.
