BUTUAN CITY- Dayag nga gitawag ni House prosecution counsel Atty. Lorna Kapunan nga usa ka “scam” ang paggamit sa Office of the Vice President (OVP) ug Department of Education (DepEd) sa milyones pesos nga confidential funds atol sa nagpadayon nga impeachment trial ni Vice President Sara Duterte.
Gibuhat ni Kapunan ang maong pahayag human makumpirma sa kanhing Commission on Audit (COA) auditor nga si Roderick Wamil ang probisyon sa COA kansa nag-ingon nga ang pampublikong pondo nga walay igo nga dokumentasyon mahimong adunay presumption nga gigamit alang sa personal nga kapuslanan sa usa ka opisyal.
Apan gitubag usab gilayon sa depensa nga si Atty. Michael Poa, ang maong pasangil ug dayong butyag nga dili angay ang maong komento. Gidawat usab ni Senate Impeachment Presiding Officer Francis “Chiz” Escudero ang objection ug gimando ang pagtangtang sa pahayag ni Kapunan gikan sa opisyal nga rekord sa impeachment court.
Samtang gihatagan og gibug-aton usab ni Kapunan ang ‘accountability’ sa pampublikong pondo sa nahimong re-direct examination niini kang Wamil. Matud pa niini, dili hinungdan ang pag-apruba sa Presidente sa confidential funds aron dili magsumite og mga gikinahanglang dokumento alang sa pagsusi sa COA.
Subay kini sa mga nag-unang testimonya sa testigo kalabot sa wala matud pa pagsumite sa opisina ni Duterte sa gikinahanglang dokumento kalabot sa pondong gigamit niini.
