BUTUAN CITY – Mas gipahugtan karon sa Department of Agriculture kon DA-Caraga ang pakig-alayon nila sa mga local government units kon LGUs aron malikayan ang food shortage higayong mu-abot ang panahon nga dili na muhatag og supply sa bugas sa Pilipinas ang atong mga angkatanang nasud sama sa Vietnam, Thailand ug uban pa.
Kini bisan og 93-porsiento pang supisyente ang supply sa bugas humay sa entiro nasud.
Sa eksklusibong pakighinabi ning sibyahan, gibutyag ni Department of Agriculture-Caraga Regional Executive Director Ricardo ‘Bong’ Oñate Jr., nga mas gipakusgan nila karon pagpatuman ang Agriculture and Fisheries Expansion Program sa tanang mga lalawigan.
Dinhi, suportahan sa mga provincial governments ang mga programang pang-agrikultura sa ilang mga kalungsuran.
Kini ilabina nga duna’y ubang mga rehiyon nga mamalit og bugas dinhi sa Caraga samtang ang ubang lalawigan usab ning rehiyon wala’y local supply hinungdan nga mamalit usab didto sa mga lalawigang duna’y daghang stocks niini.
