BUTUAN CITY – Gilantaw karon sa Bureau of Internal Revenue (BIR) ug sa Presidential Anti-Organized Crime Commission (PAOCC) ang paggamit sa mas advanced nga teknolohiya sama sa data analytics ug blockchain analytics aron mapahugot ang pagbayad og buhis sa mga online sellers sa nasud.
Sigon sa BIR, magtinabangay sila sa ubang ahensya sama sa Bureau of Customs, Anti-Money Laundering Council, ug Department of Trade and Industry aron mapalig-on ang pagbantay ug pagbayad sa buhis sa digital nga negosyo, lakip ang online selling ug bag-ong digital payment systems.
Target usab sa BIR nga mas mapahugot ang pagkolekta sa buhis gikan sa online sellers ug ang 12% value-added tax (VAT) sa digital services.
Nasayrang sukad niadtong 2024, ang mga online platforms sama sa Shopee ug Lazada nagkolekta na usab og withholding tax gikan sa ilang mga sellers, aron masira ang mga “loopholes” sa buhis, mapaayo ang intelligence sharing, ug mapalig-on ang operasyon sa lain-laing ahensya.
Tumong usab niini nga maprotektahan ang kita sa gobyerno ug masiguro ang patas nga kompetisyon sa tanan nga nagbayad og buhis.
