BUTUAN CITY – Nakig-alayon na ang Agusan del Norte Provincial Jail ngadto sa kabanay sa naghikog nilang piniriso nga si Mario Paglinawan, 62-anyos, ulitawo ug residente sa Purok 18, Brgy. Lingayao, Las Nieves, Agusan del Norte kinsa napalgan na lang nga wala nay kinabuhi sa luyong bahin sa ilang selda kaganinang alas-4:25 sa kaadlawon.
Sa eksklusibong pakighinabi sa Bombo Radyo Butuan, gipadayag ni provincial jail warden Fermin Antenorio nga ang head trustee nga si Joy Villamor maoy nakakaplag sa nagbitay na nga si Paglinawan kondiin gihiktan og sinina ang iyang li-og.
Ning mi-aging buwan matud pa kini nahukman og double life imprisonment sa kasong pagpanglugos ug posible matud pa nga naguol kini human nasayran nga nakompleto na ang iyang mga papeles aron dalhon na siya sa Davao Penal Colony kon DAPECOL karong Biernes, Septembre 2 rason nga iya na lang gikunusan ang iyang kinabuhi.
Adiser matud pa gipakanaog ang maong hukom, lima ka tuig siyang natanggong sa provincial jail kondiin wala’y nakitang problema si Antenorio sa maong biktima.
Dili matud pa kini problemado nga pagkatawo ug masinundanon pa sa tanang mga palisiyang nagtunhay sa ilang bilangguan.
Daan na matud pa nga duna kini gihambin sa iyang kaugalingon rason nga ila kining gi-isolate gikan sa uban pang mga piniriso.
