BUTUAN CITY – Posibleng mubayad og milyones dolyares sa legal fees si Prince Harry ug uban pang iladong personalidad human sila napildi sa gisang-at nilang privacy lawsuit batok sa publisher sa Daily Mail sa United Kingdom.
Sa pagdungog sa High Court sa London, gihangyo sa kampo sa Associated Newspapers nga ang mga nagsang-at sa kaso mao’y mu-abaga sa dakong bahin sa ilang legal expenses nga miabot na og £34.5 milyon o halos 46 milyon US dollars.
Apil ni Prince Harry sa mga napildi sa kaso ang singer nga si Elton John ug lima pa ka iladong personalidad human gibasura sa korte ang ilang alegasyon nga nalambigit ang Daily Mail sa mga ilegal nga kalihokan sama sa phone hacking ug ubang paglapas sa privacy.
Sumala sa abogado sa Associated Newspapers, wala’y igong ebidensya ang mga nagsang-at sa kaso aron mapamatud-an ang ilang mga pasangil hinungdan nga midako ang gasto sa pagtaral.
