BUTUAN CITY- Minsaka ang presyo sa pagkaon sa tibuok kalibotan niadtong Marso, sa pinakataas nga lebel sukad niadtong Setyembre sa miaging tuig, sumala sa taho sa United Nations Food and Agriculture Organization (FAO).
Sumala sa FAO, posible pang mosaka ang presyo niini kung magpadayon ang kagubot sa Middle East kinsa nagtuklod sa pagsaka sa presyo sa enerhiya.
Sigon ni FAO Chief Economist Maximo Torero nga ang kalit nga pagsaka sa presyo nunot sa taas nga presyo sa lana, ”cushioned by ample global cereal supplies.”
Gani, kung magdugay matud pa ang kagubot ug magpabiling taas ang gastos, posibleng kunhoran sa mga mag-uuma ang pagtanom o mobalhin sa mas sayon nga pagpananom, nga maka-apekto sa ani ug presyo ngsa pagkaon sa tibuok kalibotan.
Base sa FAO Food Price Index, mingsaka ang presyo sa pagkaon og 2.4% gikan Pebrero mas taas kini og 1% kumpara sa miaging tuig, apan dul-an 20% nga mas ubos kumpara sa pinakataas niining nakab-ot niadtong Marso 2022, human ang pagsugod sa kagubot sa Ukraine.
Ania ang lihok sa presyo sa pipika ka mga nag-unang palaliton:
- Cereal: mingsaka og 1.5%, tungod sa hinay nga ani sa U.S. ug mas gamay nga tanom sa Australia
- Bugas: ming-ubos og 3% tungod sa panahon sa anihan ug ubos nga demand
- Vegetable oil: mingsaka og 5.1%, ika-tulo nga buwan sa pagsaka dungan sa taas nga presyo sa palm oil
- Asukar: mingsaka og 7.2%, pinakataas sukad niadtong Oktubre 2025, tungod gigamit ang tubo sa paghimo og ethanol sa Brazil
- Karne: mingsaka og 1%, gisundan sa pork ug beef, samtang inanay usab nga ming-ubos ang poultry
Samtang, inanay nga gitas-an usab sa FAO ang forecast alang sa 2025 global cereal production sa record nga 3.036 billion metric tons, 5.8% nga mas taas kumpara niadtong miaging tuig.
Sumala sa FAO, ang mga presyo padayon nga ma-apektuhan sa geopolitics, presyo sa enerhiya, ug suplay sa pagkaon sa tibuok kalibotan, mao nga gipahimangnoan ang mga nasud nga magpabiling andam sa posibleng pagsaka sa gastos sa pagkaon.
