BUTUAN CITY- Posibleng mosaka ang presyo sa liquefied petroleum gas kon LPG sa umalabot nga mga adlaw tungod sa nagkagrabeng tensyon sa Middle East, nga nakaapekto sa presyo niini sa pangkalibotang merkado.
Sumala sa LPG Marketers Association kon LPGMA, mahimong mudugang og P27.50 ang presyo sa matag 11-kilogram nga LPG cylinder, o kapin P2 kada kilo. Bisan wala pa’y opisyal nga price adjustment gikan sa Department of Energy.
Sigon ni LPGMA Founder ug Chairman Arnel Ty nga misaka ang presyo human misamot pag-usab ang tensyon tali sa Estados Unidos ug Iran, nga nakaapekto sa global nga suplay sa LPG.
Dugang pa sa grupo nga dili usab lagmit adunay rollback sa presyo sa mosunod nga mga bulan, ilabina nga magsugod na ang winter stockpiling sa ubang nasud. Samtang, nabalaka ang pipila ka negosyante nga posibleng ipasa nila sa mga konsumidor ang dugang nga gasto aron mapadayon ang ilang operasyon.
