BUTUAN CITY – Mitaas og kapin 5% ang presyo sa lana sa pangkalibutanong merkado kagahapong adlawa human subling miulbo ang kabalaka nga mamahimong magubaang ceasefire tali sa Estados Unidos ug Iran.
Miabot na sa $95.46 kada bariles ang Brent crude samtang ang U.S. West Texas Intermediate (WTI) misaka sa $88.89 kada bariles.
Sumala sa taho mitaas ang presyo human gikumpiska sa Amerika ang Iranian cargo ship ug subling pagsirado sa Strait of Hormuz, nga usa sa mga agianan sa kapin 20% sa pangkalibutanong suplay sa lana.
Bisan og mihagsa ang presyo sa lana sa halos 9% niadtong nakalabay nga Biyernes tungod sa temporaryong pag-abli sa nasangpit nga Srait, subling misutoy ang presyo niini tungod sa bag-ong tensyon sa duha ka nasud.
Nagpasidaan ang mga analyst nga mamahimong magpadayon ang volatility o pag-usab sa lihok sa presyo sa lana samtang nagpabiling walay kasigaraduhan ang kasabutan tali sa U.S. ug Iran.
Posible usab nga motaas pa ang presyo sa lana kung dili maayo ang sitwasyon sa Strait of Hormuz.
Samtang gitaho nga halos mihunong usab ang pag-agi sa mga barko sa Strait of Hormuz diin tulo ka barko lang ang naka-agi sulod sa 12 oras, kumpara sa kapin 20 ka barko nga natalang miagi niadtong nakalabay nga Sabado.
Sa pikas bahin, sumala sa shipping data and traders wala nagbawal ang China sa pag-export sa refined fuel niini kundi giminusan lang nila ang kadaghanon sa ilang gipagawas sa ubang nasud diin nakapahimulos sa suplay ang pipila ka nasud sama sa Malaysia ug Australia.
