BUTUAN CITY – Init na kaayo ang dagan karon sa eleksyon sa Amerika human ang unang presidential debate tali nila re-electionist President Donald Trump ug karibal niining si kanhi Vice President Joe Biden ilabina nga dili magpapildi ang duha ka kampo.
Sa eksklusibong interview sa Bombo Radyo Butuan ngadto sa taga-Libertad ning siyudad nga si Marlon Buque, kinsa didto na nagpuyo sa California, gibutyag niining duna’y mga estado nga labaw og mga supporters si Trump samtang duna usa’y uban nga labaw si Biden.
Sa pagkakaron, si Trump matud pa ang labaw tungod kay nakatutok kini sa pagpalambo sa ekonomiya sa nasud ilabina nga apektado kini pandemya gawas nga gusto usab niining mutabang sa ubang mga nasud.
Gani bisan siya, pabor kang Trump tungod sa tinguha niining mapabalik sa trabaho ang mga tawong nawad-an og trabaho tungod sa COVID-19.
Hinuon aminado si Buque nga duna’y ubang mga kababayang Pinoy ang suko kang Trump tungod sa sobra ka-business minded niini ug daw ang iyang kaugalingong negosyo lang ang gihuna-huna.
Apan daghan usab matud pa’y dili ganahan kang Biden tungod sa tinguha niining buhisan og dagko ang mga tawo nga gikuhaan nang daan 30-porsientong buhis sa ilang kinitaan ug plano pa ni Biden nga himuong 40 ngadto sa 45%.
