BUTUAN CITY – Gidetine na sa custodial facility sa Dapa Municipal Police Station ang umber 7 most wanted sa Surigo del Norte provincial level kinsa usa ka membro sa communist terrorist group kon CTG human nadakpan sa gipahigayong manhunt operation.
Naila ang nadakpan nga si Edwin Escultura Mongado Sr., alyas “Emanwel”, 57-anyos, minyo, lumad nga taga-Poblacion 1, Jabonga, Agusan del Norte, ug temporaryong nagpuyo sa Purok 4, Brgy. Don Paulino, Dapa, Surigao del Norte diin siya nadakpan pasado alas-3:20 kagahapon sa hapon.
Natumbok kining membro sa UMAN kon Unyon sa Mag uuma sa Agusan Del Norte ug political instructor kinsa duna’y kasong murder nga gi-isyu ni Judge Fernando Fudalan, Presiding Judge sa RTC branch 14, nga nakabase sa Cabadbaran City, Agusan del Norte kansa niadto pang Marso 4, 2019 gipagawas ug wala’y girekomendang pyansa.
Ang naaresto usa sa mga suspek sa pagpusil-patay kang PCMS Reil Morgado sa Santiago, Agusan Del Norte niadtong Disyembre 13, 2018.
