BUTUAN CITY– Palapdan na sa Philippine Health Insurance Corporation kon PhilHealth sugod sunod tuig ang sakop sa benepisyo niini pinaagi sa pag-apil sa dugang nga laboratory tests alang sa sakit sa kidney, atay, thyroid ug hepatitis B, ingon man sa mga programa sa sayong pag-ila sa mga sakit aron mapugngan ang mas grabeng kondisyon.
Sumala ni PhilHealth President ug Chief Executive Officer Edwin Mercado, ang maong mga serbisyo ilalom sa Yaman ng Kalusugan Program (YAKAP) nagtumong sa mas hapsay nga pag-atiman sa pasyente gikan sa primary health care hangtod sa pagpahospital.
Lakip usab sa mga bag-ong benepisyo ang mga preventive intervention sama sa tambal sa paghunong sa panigarilyo aron malikayan ang seryosong sakit sama sa lung cancer.
Dugang pa, doblehon ang benepisyo alang sa mga batang adunay developmental disabilities pinaagi sa pagpalapad sa coverage sa occupational therapy, physical therapy, konsultasyon sa developmental pediatricians ug child psychologists, samtang ang maximum therapy sessions matag tuig tas-an gikan sa 90 ngadto sa 150.
Misaka usab ang gidaghanon sa mga benepisyaryo sa PhilHealth gikan sa kapin 5 milyon niadtong 2022 ngadto sa labaw 7.5 milyon sa kasamtangan, samtang gipaspasan usab ang pagproseso sa claims ngadto sa 15 hangtod 18 ka adlaw ug gipalapdan ang no balance billing scheme aron maminusan ang gasto sa mga pasyente.
