BUTUAN CITY – Gibutyag ni Dindo Abellanosa ang tigpamaba sa Philippine Drug Enforcement Agency- PDEA Caraga nga kaniadto pa lang bukas na ang ilang buhatan sa paggamit isip tambal o medicinal use sa marijuana kung adunay igong pagtuon nga makahatag og pagmatuod nga kini adunay maayong mahatag o binepisyo sa lawas sa tawo.
Gihimo sa opisyal ang pamahayag subay na sa pagbag-o na sa United Nations Commission on Narcotic Drugs ang klasipikasyon sa marijuana gikan sa dangerous drugs ngadto na sa less dangerous drugs.
Sa pakighinabi sa Bombo Radyo Butuan kang Abellanosa, gibutyag niining dugay nang welcome sa ilang buhatan nga mamahimong gamiton ang Cannabis o marijuana isip medicinal use kon alang lang sa pagtambal sa ubang mga sakit.
Apan giklaro niini tungod kay wala pay igong pagtuon nga nahimo ilabina mismo dinhi sa nasud rasong pabilin gihapon nilang gipatuman ang nagtunhay nga balaod nga nagdili sa paggamit sa marijuana kung alang lamang sa recreational use.
Gipadayag niining hangtod wala pay balaod o resulusyon nga magtugot na sa paggamit sa maong tanum pabilin gihapon silang manakop sa mga malapasong inbidiwal nga padayong naggamit niini.
